संतांनीसुद्धा वाळीत टाकलेला संतश्रेष्ठ चक्रधर

चक्रधर केवळ मते मांडणारा लेखक नव्हता किंवा वाऱ्यावर बोलणारा, बडबडणारा आणि वाऱ्यावरच विरून जाणारा, तोंडाची वाफ दवडणारा बोलभांड नव्हता! तर आपल्या सभोवार सतत माणसे जमविणारा, बोलता बोलता (किंवा न बोलताही) त्यांना आपलेसे करणारा, असा हा स्वयंभू जन्मजात नेता होता. थोडक्यात म्हणजे सर्वसामान्य जनतेलाच नव्हे, स्त्री-पुरुषांनाच नव्हे तर, विद्वानांना उच्चकुलीन, उच्चपदस्थ अशा थोरामोठ्यांनासुद्धा, खरे म्हणजे कोणालाही आकर्षित करण्याची अद्भुत शक्ती त्याच्या ठिकाणी होती. त्याच्या या अलौकिक आकर्षणशक्तीबद्दल सर्वांचेच एकमत दिसते.