ओळखा पाहू हा वेचा कोणत्या पुस्तकातील आहे ते... - १४

ट्रॅफिकचा दिवा हिरवा होतो न होतो तोच रांगेतील सर्वात पुढची मोटार उजवीकडे वळून गेलीसुद्धा. समोरून येणार्‍या मोटारी पाहतच राहिल्या - जणू काय त्या गाडीच्या वेगाने आणि वेगाला साजेशा आवाजाने त्यांना स्तंभित करून टाकले होते.

"क्या गा़डी है भाई! अपन तो चलाते है ये बैलगाडी - " जुनाट अ‍ॅम्बॅसेडरला वेग देत समोरच्या रांगेतला टॅक्सीवाला म्हणाला.

"होगी किसी फारिनवालेकी." टॅक्सीतला प्रवासी म्हणाला.

"माल तो फारिन का है लेकिन मालिक यहीं का है. इस गाडी को तो सब दिल्लीवाले पहचानते है - पिछले पॉँच महिनोंसे ये दौडती है यहाँकी सडकों पर." टॅक्सीवाले सरदारजी दाढी कुरवाळत म्हणाले.

अरुबिंदो मार्गावरून रिंग रोडवर वळलेली ती अल्फा रोमिओ गाडी लवकरच डावीकडे वळून वसंतविहार वसाहतीकडे गेली. तिच्या चालकाला साहजिकच आपल्या गाडीचा अभिमान होता. लहानपणापासून नवीनचंद्र पांडेला वेगवान गाड्यांचं आकर्षण होते. पुढे त्या आकर्षणाचे महत्त्वाकांक्षेत रूपांतर झाले. काहींना रोल्स राईस सर्वश्रेष्ठ वाटते, काही कॅडलिकच्या मागे धावतात तर काहींची महत्त्वाकांक्षा मर्सिडीज बेंझचा मालक व्हायची असते. नवीनला त्या डौलदार गाड्या नको होत्या. युरोपातील वास्तव्यात अनेक स्पोर्ट्सकार पाहून त्याने अल्फा रोमिओ निवडली, आणि जबरदस्त ड्यूटी भरून भारतात आणली. आल्यानंतर काही दिवसांतच ती लालभडक मोटार दिल्लीकरांच्या चर्चेचा आणि असूयेचा विषय बनली.

दुवे -
१. नवीनचंद्र पांडे.
२. अल्फा रोमिओ गाडी.
३. कादंबरिका.
४. लेखक भारतातील एक मोठा माणूस. म्हणजे ज्याची व्यक्तिमत्वीय व्याप्ती मराठीच्याही पल्याड जाते.
या दुव्यांवरही कोडे सुटले नाही, तर मात्र सोमवारी आणखी एक दुवा देतो. तो अंतिम दुवा असेल. त्यानंतर मला कोड्याचे उत्तर द्यावे लागेल. :)
हा शेवटचा दुवा -
५. विज्ञान!