ओळखा पाहू हा वेचा कोणत्या पुस्तकातील आहे ते... - २३

ओळखा पाहू हा वेचा कोणत्या पुस्तकातील आहे ते... - २३

वेदश्रीचे अभिनंदन तिने वेचा कोणत्या कादंबरीतील आहे हे बरोबर ओळखले आहे :)
वल्ली यांनी लेखकाचे नाव ओळखले होते.

संकेत १: पुस्तक सर्वस्वी मराठीच आहे (अनुवाद नाही)
संकेत २: या पुस्तकाच्या लेखकाचे हे सर्वात गाजलेले पुस्तक आहे.
संकेत ३: वेच्यात महाराज म्हणून जो उल्लेख आला आहे तो छत्रपति राजाराम महाराज यांच्याबद्दल आहे. पुस्तकात महाराज म्हणून छत्रपति शिवाजी, संभाजी व राजाराम महाराज या तिघांविषयी आहे त्यामुळे थोडा घोळ झाला. आताच भारावल्यागत पुस्तक वाचून संपवले तेव्हा दुरुस्ती करत आहे इथे.

संकेत ४: पुस्तक ऐतिहासिक नाहिये (ह्या संकेतावरुन बरीच मदत होईन पुस्तक शोधण्यासाठी)
संकेत ५: अशा प्रकारचे इतिहासाच्या वास्तवातून फॅन्टसी लेखन करणारा कदाचित हा एकमेव लेखक असावा. वल्ली यांनी लेखकाचे नाव एका प्रयत्नात दिले आहे :)
(ह्या संकेतावरुन लोकांना पुस्तक नक्की ओळखता येईल)

वेचा:
==========================================
एक दिवस हेरांनी खबर आणली. खानाच्या उत्तरेच्या तळावर सैनिकांमध्ये अतिसाराची साथ पसरली आहे. हकिमांच्या औषधांचा काही परिणाम होत नाही. सैनिक हैराण झालेले आहेत.
'त्या तळावर किती राहुट्या असतील ?' मालुसरेंनी विचारलं
'पन्नास-साठ राहुट्या आहेत. पण गस्तीमध्ये ढिलाई आहे-'
'शंभर दीडशे सैनिक तरी असतील'
'आज रात्री त्या तळावर हल्ला चढवून वेढा तोडूया' घोरपडे म्हणाले.
'हल्ला करायचा; पण त्यांच्या विरुद्ध दिशेला असलेल्या दक्षिणेच्या तळावर'
'सुभेदार तुम्ही चुकताय, दक्षिणेचा तळ मोठा आहे. उत्तरेचा तळ आपण सहज कापून काढू. वेढा मोडेल' धनाजी म्हणाले.
'आपल्याला वेढा तोडायचा आहे तो महाराजांची सुटका करण्यासाठी. मोठ्या फौजेनं दक्षिणेला हल्ला करुन खानाला गुंतवायचं. आम्ही उत्तरेकडून वेढा तोडून महाराजांना सोडवून आणतो.'
'सुभेदार नामी कल्पना आहे'
मग हल्ल्याच्या प्रत्यक्ष आखणीला सुरुवात झाली. उत्तरेला किती मावळे न्यायचे, दक्षिणेला कुणाला पाठवायचं? शेवटी असं ठरलं की निवडक जवान घेऊन मालुसरे, संताजी आणि धनाजीनं उत्तरेला जायचं. येसानं मोठा फौजफाटा घेऊन दक्षिणेला हल्ला करायचा.
येसा मावळ्यांचा फौजफाटा घेऊन दक्षिणेला गेला. तिथं लढाई सुरु झाल्यावर त्यांनी पलिते पेटवून इशारा केला. नंतर शंभर सव्वाशे मावळे घेऊन मालुसरे निघाले.
==========================================