ओळखा पाहू हा वेचा कोणत्या पुस्तकातील आहे ते... - ३१

संकेत १: प्रस्तुत पुस्तकाचे लेखक हे एक नामवंत पत्रकार आहेत.
संकेत २: हे लेखकाचे स्वतंत्र पुस्तक आहे. अनुवाद नाही
संकेत ३: सदरचे पुस्तक एका वर्तमानपत्रात 'युद्धाच्या छायेत' ही लेखमाला म्हणून प्रसिद्ध झाले होते त्याचेच हे पुस्तक प्रकाशित झाले आहे
ठीक आहे शेवटचा आणि संकेत क्रमांक ४ देत आहे. त्यावरुन ओळखणे अवघड नाही पडणार :)
संकेत ४: या लेखकाचे 'सत्तांतर' नावाचे तीन खंड खूप गाजलेले आहेत. आणि हे लेखक महाराष्ट्र टाईम्स मध्ये २७ वर्षे संपादक होते.
आता बोला मंडळी ... उत्तर येईल असे वाटते आहे :)

पुस्तकाचे नावः अग्निकांड
लेखक : गोविंद तळवलकर
लेखकाचे नाव रोचीन आणि वल्ली यांनी ओळखले. पण सत्तांतर या गाजलेल्या पुस्तकाचा संकेत दिल्यानंतर.

अनेकांनी वाचलेले नसल्यामुळे पुस्तकाचे नाव देत आहे.

वेचा:
---------------------------------------------
आक्रमणः

११ सप्टेंबर २००१ रोजी न्यूयॉर्क येथील वर्ल्ड ट्रेड सेंटरच्या इमारतींवर दोन विमानांनी धडक दिली आणि त्याच सुमारास वॉशिंग्टन इथल्या संरक्षण खात्याच्या (पेन्टॅगॉन) इमारतीवरही आणखी एक विमान कोसळले. तेव्हापासून बिन लादेन व मुल्ला महंमद ओमार, तसेच तालिबान व अल् काईदा यांचा उल्लेख जगभरची वृत्तपत्रे आणि प्रसारमाध्यमे रोजच्या रोज करत आली आहेत. बिन लादेन याने या सर्व विध्वंसक घटनांना प्रेरणा दिली असून ओमार हा अफगाणी मुल्ला बिन लादेनचा साथीदार आहे. त्यांच्यासंबंधी व तालिबान व अल् काईदा या संघटनांविषयी ११ सप्टेंबरपूर्वी मर्यादित वर्तुळात व मर्यादित प्रमाणात चर्चा होत होती. ११ सप्टेंबरच्या दुर्घटनेनंतर ती जगभर होऊ लागली. यापूर्वी केनिया आणि तान्झानियामधील अमेरिकन वकिलातींवर बॉम्बहल्ला झाला होता आणि अमेरिकन नौदलाच्या बोटींवरही झाला. या सर्व हल्ल्यांत अमेरिकन व स्थानिक लोक बळी पडले होते. त्यांमागे बिन लादेनचा हात असल्याचा अमेरिकेचा ग्रह असल्यामुळे बिन लादेन याच्या सुदानमधील कारखान्यावर क्षेपणास्त्र धाडून तो नष्ट करण्यात आला. तसेच अफगणिस्तानात बिन लादेनचा जिथे मुक्काम असल्याची अमेरिकेकडे माहिती होती त्या ठिकाणीही बॉम्बहल्ला करण्यात आला. पण बिन लादेन यास याची सूचना अगोदरच मिळाली असल्यामुळे तो निसटला आणि त्याच्या हस्तकांनी ११ सप्टेंबर रोजी न्यूयॉर्क आणि वॉशिंग्टन इथेच विमानांची धडक देऊन दहशतवादाचा एक नवा आणि भयानक प्रकार जगास दाखवून दिला. असा हा बिन लादेन कोण आहे; तो इतका प्रबळ कसा झाला; त्याला मदत करणारा मुल्ला ओमार याची पूर्वपिठीका काय; या दोघांच्या संघटनांची शक्ती वाढली कशी, इत्यादीची माहिती करुन घ्यायची तर सोव्हिएत युनियनने अफगणिस्तानावर केलेल्या लष्करी आक्रमणाचा इतिहास लक्षात घेणे आवश्यक आहे. कारण बिन लादेन हा या आक्रमणाच्या काळात पुढे आला आणि त्याहीपेक्षा सोव्हिएत युनियनने अफगणिस्तानमधून माघार घेतल्यानंतर त्याचे नेतृत्त्व प्रस्थापित झाले. एक नवा दहशतवादी पंथ त्याने वाढवला. ....