ओळखा पाहू हा वेचा कोणत्या पुस्तकातील आहे ते... - ४७

पुस्तक वाचले असल्यास कोणताही संकेत देण्याची आवश्यकता नाही.

संकेतः या लेखकाच्या अलिकडच्या एका पुस्तकाने वाचकांना निराश केले. कारण त्याची तुलना या पुस्तकाशी झाली ज्यातील हा वेचा आहे. :)

संकेताची गरज नाही याची खात्री होतीच. त्याप्रमाणे सर्वप्रथम मस्त कलंदर नंतर वल्ली , निखिल यांनी बरोबर ओळखले आहे. :) तसेच इंद्रराज व दिगम्भा यांनीही ओळखले आहे

वेचा:
=================================
संध्याकाळी मामा आला.
पण जेवण होऊन गेलं, तरी नोकरीचं कसं काढावं हे कळेना.
तेव्हा त्यांना वाटलं, हा इकडेच झोपणार असेल. म्हणून त्यांनी माझी झोपायची तयारी केली. उद्या आपण दहापर्यंतही उठणार नाही. तेव्हा ह्यांना आत्ताच मोकळं करावं, म्हणून मी घाबरुन मुद्द्याला हात घातला.

तेव्हा सगळीच चर्चा अतिशय खालच्या सुरात झाली. आधी मामा म्हणाला, तुला आणि नोकरी? ती काय म्हणून?
मी म्हणालो, मला आयते पैसे खर्चायचा कंटाळा आला आहे. मला अनुभव घ्यायचा आहे.
हे नोबल स्पिरिट इतकं काही चांगलं नाही. हे अमेरिकेत ठीक आहे. आपल्याकडे गोरगरीब लोकांना नोकर्‍यांची मारामार. तिथे तुझ्यासारख्यानं धडपडावं? तू खरं तर आरामात पैसे खर्च करावेस. परीक्षा द्याव्यात. एकदा नाही जमलं, तर सातदा द्याव्यात. फॉरिनला जावं - तर हे काय खूळ काढलंस?
मी म्हणालो, मला नोकरी पाह्यजे आहे. येत्या एक तारखेपासून.

शेवटी तो म्हणाला, अरे पण एवढी घाई काय? तुला त्यातल्या त्यात कमी त्रासाची नोकरी मिळवून देतो. माझ्या हातात आहे सगळं. महिनाभर थांब.

मग त्यानं मला सकाळची चालेल का संध्याकाळची, गोदीतली चालेल की गोदीच्या ऑफिसातली - हे सगळं ठाकठीक विचारुन घेतलं. आणि म्हणाला, येत्या महिन्यात तुला एकदा येऊन जावे लागेल. इंटरव्ह्यू माझा असिस्टंट घेतो. मग पुढच्या महिन्यात किंवा फारतर त्याच्या पुढच्या महिन्यात तू इकडे कायमचाच ये. तू आता पुण्याला जाणार काय?