ओळखा पाहू हा वेचा कोणत्या पुस्तकातील आहे ते... - ५१

५१ वे पुस्तककोडे देताना मी सध्या वाचत असलेल्या एका 'आत्मचरित्रा' तील वेचा द्यावा असा बेत केला होता....पण या अगोदरचा वेचाही आत्मचरित्रातीलच असल्याने पाठोपाठ तोच प्रकार नको, म्हणून हा खालील वेचा (अन्य गटातील) निवडला आहे.

".....एवढे सहा महिने जाऊ द्या. मग बघा !" हे वाक्य तर मी वयाच्या सहाव्या महिन्यापासूनच आजपर्यंत ऐकत आलो आहे. शनी, गुरू, मंगळ किंवा आणखी कोणीतरी असाच स्वगृही यावा लागतो. ही मंडळी आपली घरं सोडून आधी इतरांची घरं धुंडाळीत हिंडतातच का हे मला अजूनही कळलं नाही. माझी 'सनलाईन' कमालीची सुंदर आहे हेही मला पुष्कळांनी सांगितलं आहे. परंतु तिचा अजूनही उजेड पडलेला मला आठवत नाही. काहींनी माझे कुंडली एकदम कंडम ठरवून बायकोच्या नशिबानं मी 'खातो' आहे असं तिच्यासमोर बजावून माझ्या घरचे पोहे, शिरा वगैरे खाल्ले आहेत. घरी जन्माला येणारं प्रत्येक मूल भलतंच भाग्य घेऊन आलं आहे ही हमी तर मी पाच वेळा ऐकली. आणखी किती वेळा ऐकणं नशिबात आहे, देव जाणे !..."

संकेत
१. हे ज्योतिषशास्त्रावरील भाष्य आहे, हे तर स्पष्टच आहे....पण पूर्ण पुस्तक याच विषयावर नाही.
२. लेखकाविषयी संकेत सांगण्यात अर्थ नाही...मग मजाच जाईल.

संकेत क्रमांक २
महाराष्ट्रातीलच काय पण ज्या ज्या ठिकाणी "मराठी" भाषेतील पुस्तक विक्रीला ठेवले जाते तिथे तिथे या लेखकाचे किमान एक तरी पुस्तक असतेच असते.

जाहीर करत आहे : "असा मी असामी" ~ श्री.पु.ल.देशपांडे

इन्द्रा