ओळखा पाहू हा वेचा कोणत्या पुस्तकातील आहे ते... - ६३

संकेत १ : हा वेचा एका कथासंग्रहातील आहे. तुलनेने हा वेचा ओळखायला बर्‍यापैकी सोपा आहे. या पुस्तकात स्त्री व्यक्तिरेखा प्रभावीपणे चितारलेल्या आहेत.
संकेत २ : वेच्यात दोन शब्द ठळक केले आहेत. पहिला ठळक केलेला शब्द लेखकाच्या दुसर्‍या एका पुस्तकाच्या नावाकडे दिशानिर्देश करतो आणि दुसरा ठळक शब्द वेचा ज्या पुस्तकातील आहे त्याकडे दिशानिर्देश करतो.
संकेत ३: सदर पुस्तकाच्या लेखकाला त्याच्या दुसर्‍या एका पुस्तकासाठी (सत्तांतर साठी) साहित्य अकादमीचा पुरस्कार मिळाला आहे.
संकेत ४: वल्ली आणि इंद्रराज पवार यांनी प्रयत्नाअंती लेखक ओळखला आहे - व्यंकटेश माडगूळकर

आता ओळखा मंडळी :)

विजेता मिळाला की उत्तर जाहीर करेन.

विजेता न मिळाल्याने उत्तर जाहीर करत आहे

पुस्तकाचे नावः जांभळाचे दिवस
लेखकः व्यंकटेश माडगूळकर
कथा: बाई (ही सात नंबरची कथा)

वेचा:
------------------------------------------------
मुंबईतील अनेक चाळींप्रमाणे गिरगावात यादववाडीत नाना जातीची, नाना स्वभावांची अनेक माणसे राहतात. चाळीत शिरुन डाव्या हाताला वळले, दोन मजले चढून गेले की ओळीने काही खोल्या आहेत. या खोल्यांसमोर अरुंद अशी गॅलरी आहे. कोळशाची पोती, मोडक्या खुर्च्या, काहीबाही भरुन ठेवलेली खोकी, असले सामान हरेक खोलीसमोर आहे. फक्त सात नंबरच्या खोलीसमोर काहीही नाही. या सगळ्या खोल्यांतून माणसे खच्चून भरलेली आहेत. घामाने, गर्दीने, कामाने उबगलेली ती माणसे एकमेकांवर सारखी ओरडत असतात, चिडत असतात. एकसारखी इकडे तिकडे हलत असतात. फक्त सात नंबरची खोली शांत असते. या सर्वच खोल्यांना नीट उजेड नाही. वारा येण्यासाठी खिडक्या नाहीत. त्यामुळे सर्व खोल्यांची दारे सताड उघडी असतात. दाराशेजारची एकच एक खिडकी उघडी असते. दारावरचे झापड उघडे असते. सात नंबरच्या खोलीचे दार कधी आतून तर कधी बाहेरुन असे सदैव बंद असते! सात नंबरची खिडकी क्वचित् उघडी दिसली तरी जाडसा पडदा तिला असतो. सात नंबरच्या दारावरचे झापड सदैव बंद असते. एवढेच नव्हे तर त्याच्या काचांना काळा कागद लावलेला आहे. अगदी शेवटच्या खोलीशेजारी नळ, न्हाणीघर आहे.
त्यामुळे त्या अरुंद गॅलरीतून सारखी ये-जा चालू असते. साहजिकच माणसे जाता जाता उघड्या दाराकडे चोरटी नजर टाकतात. एक नंबरमधली यादवनानांची बायको पाठमोरी बसून मटण चिरताना दिसते. दोन नंबरमधली गुजराथ्याची बायको वाढताना आणि गुजराथी जेवताना दिसतो. पलिकडे म्हातार्‍या कच्छ्याची तरुण बायको दार उघडे टाकून साडी बदलीत असते. सहा नंबरमधले जोडपे एका पलंगावर पडून मासिक वाचताना दिसते. पण सात नंबरमध्ये कधीही काही दिसत नाही. सात नंबरमध्ये बाई राहतात. गेली सोळा वर्षे त्या या खोलीत राहात आहेत.
------------------------------------------------