ओळखा पाहू हा वेचा कोणत्या पुस्तकातील आहे ते... - ७४

संकेत : गरज पडल्यास उद्या देईन. :)

संकेताची गरज शक्यतो पडणार नाही असा अंदाज होताच. पण वेचा ओला असतानाच चित्रा यांनी विक्रमी वेळेत पुस्तक नेमके ओळखले आहे. चित्राजी अभिनंदन :)

या पुस्तकाच्या निमित्ताने दिग्गज वाचक श्रावण मोडक यांची वेचा कोड्यात बर्‍याच दिवसांनी उपस्थिती जाणवली त्याबद्दल खूप आनंद झाला.
चित्रा यांच्यानंतर श्रामोने हे पुस्तक ओळखले.
त्यानंतर वल्ली याने आणि अर्थातच दिग्गज वाचक इंद्रराज पवार यांनी ही ओळखले.

या पुस्तकाबद्दल वेगळा संकेत द्यायला लागेल असे मलाही वाटले नव्हते.
तसे रणांगण न वाचलेल्यांचा आणि सुहास शिरवळकर यांची योगायोग ही कथा वाचणार्‍यांची हॅर्टा या नावामुळे चांगलीच फसगत झाली असती असा हा वेचा होता... कारण हॅर्टा आणि कथानायक यांची प्रेमकथा एका जहाजावरच सुहास शिरवळकरांनी फुलवलेली आहे. खरे तर ती विस्मयकथा आहे :)

असो उत्तर जाहीर करतो आहे

पुस्तकाचे नाव : रणांगण ( या कादंबरीची ही १४वी आवृत्ती)
लेखक : विश्राम बेडेकर ( यांना साहित्य अकादमी पुरस्कार मिळाला आहे त्यांच्या आत्मचरित्रासाठी)
वेच्याचे पुस्तकातील स्थान : पान क्रमांक : ४३

म.टा.ने गौरवलेल्या अंतर्नाद मासिकात सर्वोत्कृष्ट पुस्तकांच्या यादीत हे आहे. हा पहा दुवा

वेचा :
---------------------

रात्री हॅर्टाशी मैत्री झाली. त्या अनुभवाने मन जागे होईल असे संध्याकाळी कुणी म्हटले असते तर मला खरे वाटले नसते. मी त्याला वेडा, अननुभवी म्हणून सोडून दिले असते! पण प्रत्यय निराळा आला. मागे काही झालेच नाही अशा आवेगाने शरीर पुन्हा जिवंत झाले. मन चैतन्याने भारले गेले. कात टाकल्यावर नाग तरुण होतो, की तारुण्याची नवीन उसळी आल्यावर तो कात टाकतो हे मला माहित नाही. पण काल हॅर्टाच्या मिठीत न्हाऊन निघालेलं हे शरीर; त्यावरचे किल्मिष झडून गेल्यासारखे वाटते आहे. तिचाही बेभानपणा असीम होता. आमच्या मागे ते जोडपे उभे होते. मी तिकडे सहज नजर वळवली.
त्याबरोबर माझी हनुवटी धरुन तिने माझे तोंड फिरविले.
मी विचारले, "का?"
तेव्हा स्निग्ध स्वरात ती म्हणाली. "तू तिकडे बघू नकोस. बिचारी सुखात दंग आहेत. पाहिलंस तर चोरट्यासारखं होईल त्यांना."
मी मुद्दाम म्हटले, "दंग आहेत म्हणजे काय? "
तिने माझे खांदे धरुन मला फिरवले. आपणही समोर वळली. आम्ही दोघेही बघू लागलो. कठडा कार्डबोर्डासारखा चित्रातला दिसत होता. पलीकडे अथांग निळेपणा. त्या तरुणाने पोरीला जवळ घेतले होते. त्याच्या मिठीत तिचे भान हरपले. ...
...
वरती कप्तानाच्या केबिनमध्ये लहानशी घंटा वाजली. क्षणमात्र सर्चलाईटचा प्रकाश डेकवर पडला. ...
---------------------