पुस्तक हवे आहे.

मी सहावीत असताना मला एक पुस्तक बक्षीसादाखल मिळाले होते जे पुढे कितीतरी काळ माझे आवडते होते. त्या पुस्तकात मला वाटतं सहा-सात कथा होत्या. पुस्तक लहान मुलांकरता होते.

पहिली कथा साकुरा नावाच्या मुलाची होती आणि मला वाटते त्या पुस्तकाचं नाव सुद्धा त्याच्यावरुनच होतं. 'साकुराची मांजरं'.
साकुराला मांजरं रंगवण्याचा खूप नाद असतो आणि जिथे बसेल तिथल्या भिंती तो मांजरं चितारुन रंगवून टाकत असतो. जिभल्या चाटणारी, सयामी, मिशा फुर्र फुर्र करणारी ती मांजरं चित्रातही जिवंत वाटावी इतकी खरी वाटत. गावकरी ह्या प्रकाराला वैतागले होते. एकेदिवशी साकुरा देवळाची भिंतच चितारुन ठेवतो आणि गावकरयांच्या संतापाचा स्फोट होतो आणी ते साकुरा ला गावातून हाकलून लावतात. पण होतं काय, त्या रात्री गावावर खूप मोठ्या-मोठ्या उंदरांची धाड पडते आणि मग साकुराची मांजरं चित्रातून जिवंत होऊन त्या उंदरांचा नायनाट करतात. दुसरया दिवशी धाडीमुळे घाबरलेले गावकरी देवळात एकत्र जमतात आणि चित्रांतल्या मांजरींच्या दातांवर रक्त पाहून त्यांना काय झाले असावे याचा उलगडा होतो आणि मग गावकरी साकुराला गावात वाजतगाजत घेऊन येतात वगैरे.

दुसरी कथा एका छोट्याशा मुलीची होती.___चा बूट म्हणून. मुलीचे नाव आठवत नाही.
तिचे वडील राजासाठी प्रचंड मोठी घंटा तयार करण्याचे काम करत असतात. त्या घंटेसाठी खूप सारं पितळ, सोनं आणी चांदी वापरण्यात आलेली असते. घंटा सर्वात मोठी आणि तिचा आवाज कणीदार व्हावा ही राजाची इच्छा असते. __चे वडील त्यासाठी जिवाचे रान करत असतात पण प्रत्येक वेळी साचा फसतो. दोन वेळेस असं होतं आणी तिसरया वेळेस असं झालं तर देहांताची शिक्षा दिली जाईल असे राजा फर्मावतो. तिसरा साचा ओतला जाण्याच्या वेळेस ___ तिथे हजर असते. पण त्या द्रावणावरुन यावेळेसही साचा फसणार याची ___ला खात्री पटते आणि ती धावत जाऊन त्या उकळत्या द्रावणात उडी घेते. तिची दाई तिला धरायचा प्रयत्न करते पण तिच्या हातात ___चा बूट तेव्हढा राहतो. आणि काय आश्चर्य! साचा यावेळी फसत नाही. पण एव्हढ्या छोट्या मुलीचं बलिदान पाहून समस्त लोकांच्या तोंडून स्स्स्ss असे सुस्कारे निघतात. अजूनही कान देऊन ऐकलं तर त्या घंटेच्या दणदणीत तरी मंजुळ घंटानादानंतर हा सुस्कारा ऐकू येतो.

आणखी एक कथा होती ती एका राजाच्या उद्धट मुलीची. ती सेवकांना,दायांना उलट-सुलट कसेही बोलत असते. आणि ती अशी असते म्हणून तिच्या बागेतलं गुलाबाचं झाड बहरत नसतं. आपल्या मुलीच्या या वर्तनाने राजा चिंतेत असतो. मग काहीतरी घडतं आणि तिच्या स्वभावात आमूलाग्र बदल घडून येतो (अर्थातच!) आणि मग ते झाड भरभरून कळ्या द्यायला लागतं अशा आशयाची कथा होती.

मला इतर कथा आठवत नाहीत, या पुस्तकाचे लेखक माहीत नाहीत, प्रकाशन-गृह माहीत नाही, कथेच्या नावाबद्दलही मी साशंकच आहे. आठवतायेत त्या या तीन कथा आणि वेगवेगळी मांजरं रंगवलेलं मुखपृष्ठ. पुढे शिफ्टींग करताना ते गहाळ झालं.
आतापर्यंत जिथे जिथे प्रदर्शनं लागली, जिथे जिथे खरेदी केली तिथे तिथे मी या पुस्तकाची विचारणा केलेली आहे, एखादी जुनी प्रत असली तरी हरकत नाही असे सांगून ठेवलेले आहे पण आतापर्यंत कुठूनही प्रतिसाद नाही. पुस्तकविश्व वरील कोणाकडे हे पुस्तक असल्यास कृपया सांगा. हे पुस्तक कुठल्याही,कसल्याही रुपात संग्रही असावे अशी माझी इच्छा आहे.