अमिताव घोष

अमिताव घोष (जन्म : ११ जुलै १९५६) हे भारतीय-अमेरिकी इंग्रजी लेखक आहेत. त्यांनी डेहराडूनच्या डून स्कूलमध्ये शिक्षण घेतले आणि ऑक्सफर्ड विद्यापीठातून सामाजिक मानवशास्त्रात डॉक्टरेट मिळवली. त्यांनी नवी दिल्लीत 'इंडियन एक्सप्रेस' वृत्तपत्रात आणि अनेक शैक्षणिक संस्थांमध्ये काम केले. 'द सर्कल ऑफ रीझन' (१९८६) ही त्यांची पहिली कादंबरी; त्यानंतर 'द शॅडो लाइन्स' आणि 'द ग्लास पॅलेस' या कादंबऱ्या आल्या. २००४ ते २०१५ या काळात त्यांनी पहिल्या अफूयुद्धावर आधारित 'आयबिस' त्रयी लिहिली. 'इन ॲन अँटिक लँड' (१९९२) आणि हवामानबदलावरील 'द ग्रेट डिरेंजमेंट' (२०१६) ही त्यांची ललितेतर पुस्तके आहेत. २००७ मध्ये त्यांना पद्मश्री आणि २०१८ मध्ये ५४वा ज्ञानपीठ पुरस्कार मिळाला.