हरिवंशराय बच्चन

हरिवंशराय बच्चन (२७ नोव्हेंबर १९०७ – १८ जानेवारी २००३) हे हिंदीतील प्रसिद्ध कवी आणि लेखक होते. त्यांचा जन्म उत्तर प्रदेशातील प्रतापगड जिल्ह्यातील बाबूपट्टी येथे झाला; त्यांचे कौटुंबिक आडनाव श्रीवास्तव होते. 'बच्चन' या टोपणनावाने त्यांनी हिंदी कविता लिहिल्या. 'मधुशाला' ही त्यांची दीर्घ कविता विशेष प्रसिद्ध आहे. १९४१ ते १९५७ या काळात त्यांनी अलाहाबाद विद्यापीठाच्या इंग्रजी विभागात अध्यापन केले आणि नंतर केंब्रिजमधून डब्ल्यू. बी. येट्सवर पीएच.डी. केली. नंतर ते परराष्ट्र मंत्रालयात हिंदी विशेषज्ञ होते आणि राज्यसभेचे नामनिर्देशित सदस्यही होते. १९७६ मध्ये त्यांना पद्मभूषण मिळाले. अभिनेते अमिताभ बच्चन हे त्यांचे पुत्र.