प्रभा अत्रे

डॉ. प्रभा अत्रे (१३ सप्टेंबर १९३२ – १३ जानेवारी २०२४) या किराणा घराण्याच्या ज्येष्ठ हिंदुस्तानी शास्त्रीय गायिका होत्या. त्या पं. सुरेशबाबू माने आणि हिराबाई बडोदेकर यांच्या शिष्या होत्या. संगीतक्षेत्रातील योगदानाबद्दल भारत सरकारने त्यांना १९९० मध्ये पद्मश्री, २००२ मध्ये पद्मभूषण आणि २०२२ मध्ये पद्मविभूषण देऊन सन्मानित केले. १८ एप्रिल २०१६ रोजी नवी दिल्ली येथे एकाच मंचावरून संगीतावरील ११ पुस्तके प्रकाशित करण्याचा विक्रम त्यांनी केला. वयाच्या ९२ व्या वर्षी पुण्यात त्यांचे निधन झाले.