समर्थ रामदास

समर्थ रामदास (जन्मनाव नारायण सूर्याजी ठोसर; २४ मार्च १६०८, जांब – १३ जानेवारी १६८१, सज्जनगड) हे महाराष्ट्रातील संतकवी आणि समर्थ संप्रदायाचे संस्थापक होते. राम आणि हनुमंत यांना उपास्य मानणाऱ्या रामदासांनी परमार्थ, स्वधर्मनिष्ठा आणि राष्ट्रप्रेम यांच्या प्रसारासाठी महाराष्ट्रात प्रबोधन व संघटनाचे कार्य केले. ते संत तुकारामांचे समकालीन होते. राजकारण आणि धर्मकारण यांची सांगड जाणीवपूर्वक घालणारे संत म्हणून त्यांचा उल्लेख केला जातो. पर्यावरणाविषयी प्रबोधन करणारे लेखनही त्यांनी केले आहे.