सर्वपल्ली राधाकृष्णन

डॉ. सर्वपल्ली राधाकृष्णन (५ सप्टेंबर १८८८ – १७ एप्रिल १९७५) हे भारतीय तत्त्वज्ञ आणि राजकारणी होते. ते १९५२ ते १९६२ या काळात भारताचे पहिले उपराष्ट्रपती आणि १९६२ ते १९६७ या काळात दुसरे राष्ट्रपती होते. त्याआधी ते बनारस हिंदू विद्यापीठाचे कुलगुरू (१९३९–१९४८) आणि सोव्हिएत युनियनमधील भारताचे राजदूत (१९४९–१९५२) होते. कलकत्ता विद्यापीठ आणि ऑक्सफर्ड विद्यापीठात त्यांनी तत्त्वज्ञान आणि पौर्वात्य धर्मांचे अध्यापन केले. विसाव्या शतकातील तुलनात्मक धर्म आणि तत्त्वज्ञानाच्या प्रतिष्ठित विद्वानांपैकी एक असलेल्या राधाकृष्णन यांचे तत्त्वज्ञान अद्वैत वेदान्तावर आधारित होते.