सुनीता देशपांडे

सुनीता पुरुषोत्तम देशपांडे (३ जुलै १९२६ – ७ नोव्हेंबर २००९), पूर्वाश्रमीच्या सुनीता ठाकूर, या मराठी लेखिका आणि सामाजिक कार्यकर्त्या होत्या. त्यांचा जन्म रत्नागिरी येथे झाला. १२ जून १९४६ रोजी त्यांचा पु. ल. देशपांडे यांच्याशी विवाह झाला. 'वंदेमातरम्' या चित्रपटात त्यांनी भूमिका केली, पुलंच्या 'सुंदर मी होणार' नाटकात दीदीराजेंची भूमिका साकारली आणि 'राजमाता जिजाबाई' हा एकपात्री प्रयोगही केला. १९९० मध्ये प्रकाशित झालेले 'आहे मनोहर तरी...' हे त्यांचे आत्मकथन गुजराती, हिंदी, कन्नड आणि इंग्रजीत अनुवादित झाले. जी. ए. कुलकर्णी यांच्याशी झालेल्या पत्रव्यवहाराचे 'प्रिय जी. ए.' हे पुस्तकही त्यांनी प्रसिद्ध केले. २००८ मध्ये त्यांना पहिला 'प्रिय जीए पुरस्कार' मिळाला. पुणे येथे त्यांचे निधन झाले.