सीतायण

‘सीतायण’ ही Chitra Banerjee Divakaruni यांनी लिहिलेली प्रभावी आणि संवेदनशील कादंबरी आहे, जी रामायणाला सीतेच्या दृष्टिकोनातून नव्याने उलगडते.

रामायण हे जगातील महान महाकाव्यांपैकी एक मानले जाते; परंतु या कादंबरीत कथा केंद्रस्थानी आहे ती सीता. तिच्या भावविश्वातून, तिच्या वेदना, आनंद, संघर्ष आणि प्रश्नांतून उभं राहणारं हे ‘सीतायण’ वाचकाला एका नव्या दृष्टीकोनातून रामायण अनुभवायला भाग पाडते.

वनवासातील एकाकीपणा, प्रेम, विश्वासघात, कर्तव्य आणि स्त्री म्हणून जगताना तिला सहन करावे लागलेले अन्याय यांचं अत्यंत भावनिक आणि प्रभावी चित्रण या पुस्तकात आहे.

या कादंबरीत सीतेबरोबरच कैकेयी, शूर्पणखा आणि मंदोदरी यांसारख्या स्त्रियांनाही माणूस म्हणून समजून घेण्याचा प्रयत्न करण्यात आला आहे. पारंपरिक कथांमध्ये उपेक्षित राहिलेल्या या स्त्रियांच्या मनातील भावना, संघर्ष आणि अस्तित्व यांचा सखोल वेध येथे घेतला आहे.

‘सीतायण’ ही केवळ पौराणिक कथा नाही, तर ती आजच्या काळातील स्त्रीस्वातंत्र्य, नातेसंबंध, सन्मान आणि आत्मसन्मान यांवर भाष्य करणारी समकालीन कादंबरी आहे.