एवढ्यात तुम्ही कोणती पुस्तके विकत घेतली आहेत? भाग - २

क्रमांक ४ वगळता....सर्व पुस्तके माझ्याकडे आहेत...पण तीवर आता इथे काही लिहिणे म्हणजे तुमचा वाचनातील रस कमी करण्यासारखे होईल. पण खूपच चांगली आणि अनुभवसंपन्न आहेत ही पुस्तके.

(थोडीसी दुरुस्ती करा >>> "रारंग ढांग" चे लेखक प्रभाकर पेंढारकर आहेत....भालचंद्र नव्हेत.)

-- शक्य झाल्यास प्रभाकरांचेच "एका स्टुडिओचे आत्मचरित्र" ही संग्रही ठेवा....इतिहासच आहे....मराठी सिनेसृष्टीच्या एका आपुलकीच्या निर्मिती स्थळाचा.

इन्द्रा

नातिचरामी मी तुला चकटफू दिले असते! :(

मी घेतलेली -

मुक्काम
सखा नागझिरा.

यशोधराताई, तुमचा काहीसा गैरसमज झाला आहे असे दिसते. चला, नव्याने माझी याबाबतीतील भूमिका मांडतो.

मुळात श्री.सागर यानी ५ पुस्तकांची 'एवढ्यात मी विकत घेतलेली पुस्तके...' असे धाग्यात म्हटल्याने व व्याकरणदृष्ट्या ते वाक्य 'चालू पूर्ण वर्तमानकाळ' असल्याने आता त्या विधानापासून ते मागे सरकणार नाही असा होतो; कारण विकत घेण्याची प्रक्रिया झाली आहे. याचाच अर्थ "नातिचरामी' आहे एका ऑनलाईन लिस्टमध्ये म्हणून त्यानी ते घेतले असे नसून त्याबद्दल निश्चितच कुठेतरी त्यावरील प्रतिक्रिया (उलटसुलट) वाचली असणार, समानधर्मी मित्रांसमवेत समोरासमोर चर्चा केली असणार....मगच त्यानी 'शॉपिंग कार्ट' ला क्लिक केले असणार....इतपत लॉजिकली योग्य आहे असे तुम्हीही मानाल.

असे असताना ते सहजगत्या इथे लिहून गेले की, "सध्या तरी यादीतून काढून टाकत आहे..." ~ याचे मला फार वाईट वाटले. "हे घेऊ का?" असा प्रश्न त्यानी प्रथम तुम्हाला खरडीद्वारे विचारला असता तर तुमच्या त्या थेट 'चकटफू देते..." या प्रतिसादामुळे त्यानी नक्कीच ती आपल्या यादीतून काढून टाकली असती, मग त्यानंतर ती विकत घेण्याचा प्रश्नच उदभवला नसता आणि तुम्हा दोघातच तो संवाद घडला असल्यामुळे आताची मतमतांतरे खुल्या चर्चेत आलीही नसती.

पुस्तक सडेतोड आहे म्हणून पचनी पडत नाही हे म्हणणे म्हणजे इतर वाचकांच्या आकलन शक्तीवर मते देणे झाले!
~ नाही....माझ्या विधानाला असे ट्विस्ट करून टाकता येत नाही. मी कुण्याच्याही आकलन शक्तीचा मुद्दा त्या वाक्यात आणलेला नाही. 'पुस्तक सडेतोड आहे म्हणून ज्याना जीवनातील प्रखर वास्तव्य नको तर दिवाणखान्यातील सुबक टीपॉयचाच आनंद हवा आहे त्याना मीरा पचनी पडत नाही...' असा विस्ताराने अर्थ होतो...इथे कुणाच्याही आकलन शक्तीचा अधिक्षेप करण्याचे प्रयोजन येतच नाही. 'नातिचरामी' असो वा अन्य कोणतेही पुस्तक न वाचता ते यादीतून (मुळात असलेले) काढून टाकणे हे 'आदर्श वाचका'च्या व्याखेत बसत नाही....आणि मी श्री.सागर यांच्याकडे त्या व्याखेच्या व्यापक अर्थाने पाहात असल्याने माझे मत जाणीवपूर्वक मांडले.

~ मिपावर दीडदोन महिन्यापूर्वी 'कोसला' बद्दलही असलीच १००+ प्रतिसादांची चर्चा झाली. त्यातील काही बेताल, बालिश प्रतिसाद तर अशासाठी चीड निर्माण करणारे होते की जवळजवळ ७५% सदस्यांनी कोसला वाचलेलीच नाही आणि तरीही बेमुर्वतखोरपणे त्या साहित्यातील मानदंड ठरलेल्या कादंबरीची लक्तरे काढणे चालूच होते. तिथे मी एकही ओळ लिहिली नाही, कारण मी जाणून होतो की माझ्या कोसलाची बाजू घेणार्‍या भूमिकेवर किती 'लो लेव्हल' चे प्रतिसाद येतील.

इथे "नातिचरामी' बद्दल लिहिले म्हणजे ही कादंबरी सर्वांनी डोक्यावर घेऊन नाचावी या लायकीची आहे असे मी कदापिही म्हणणार नाही....कुठे म्हटलेलेही नाही. (आवश्यकता भासल्यास यापूर्वी ज्या तीनचार मित्रमैत्रीणीमध्ये - जे इथल्या कोणत्याही शाखेचे सदस्य नाहीत - या कादंबरीवर ई-मेलद्वारे मी चर्चा केली आहे, अन् मेघना पेठे यानी पळवाटीधर्तीचा शेवट करून कादंबरी शेवटी किती रद्दड केली आहे, यावर विस्तृत लिहिले आहे....ते पत्रही सागर याना देवू शकतो). मेघना पेठे म्हणजे मार्गारेट मिचेल वा अरुंधती रॉय नव्हे की जिच्या कादंबरीमुळे एक इतिहास निर्माण होईल....पण तरीही तिच्याही लेखन स्वातंत्र्याला जर 'राजहंस' स्वीकारते तर टीका करण्यासाठी का होईना, ती प्रथम वाचणे अन् मगच तिच्याबद्दल अनुकूल/प्रतिकूल मत बनविणे योग्य आहे. (जे तुम्ही आणि मी दोघांनीही त्या त्या अर्थाने केलेले आहेच.)

खंत हीच वाटते की, १९३०-३५ दरम्यान इथे एक 'विभावरी शिरूरकर' पुढे येते आणि हुंड्याच्या विरोधात स्त्री-पुरूषांनी 'लीव्ह-इन' धर्तीचे नाते प्रस्थापित केले तर...असे काहीसे क्रांतिकारी विचार कादंबरीच्या माध्यमाद्वारे मांडते त्यामुळे महाराष्ट्रात सनातन्यामध्ये माजलेला गोंधळ आठवला तर २०१० च्या मेघना पेठेच्या मीराने त्यापुढील पाऊल टाकले म्हणून तिच्या स्त्री-स्वातंत्र्याच्या व्याख्येला विरोध होतोच. पण असो...शेवटी जशी एखाद्या कलाकृतीची बाजू घेणे हे घटनेने दिलेल्या स्वातंत्र्याच्या कक्षेत येते, तद्वतच तिला विरोध करणेही नैसर्गिकरित्या त्याच स्वातंत्र्याचा परिपाक आहे.

तुमच्या प्रतिसादाचा शेवट तुम्ही श्री.सागर यांच्या वाचक-स्वातंत्र्याच्या प्रश्नाने केला आहे. त्याबद्दलच तर मी तो प्रतिसाद लिहिला होता की, पुस्तक जर 'ऑर्डर केलेच आहे, तर वाचून ते भिकार आहे..." असे ठरवून बाजूला ते फेकू शकतात ना? इथे मी माझे मत 'नातिचरामी' बद्दल मांडलेले नसून 'पुस्तक-वाचना' बद्दल मांडले आहे...जे सर्वच ललितकृतीना लागू आहे.

असो....'पुस्तकविश्व' वर मी आलो आहे, ते पुस्तकप्रेमींच्या संगतीत राहण्यासाठी....त्यांच्यासमवेत पुस्तकाच्या दुनियेची विविध अंगाने सफर करण्यासाठी....तेव्हा अकारण इथे धुक्यातील वाटेने प्रवास नको.

धन्यवाद.

इन्द्रा

सध्या समग्र रिचर्ड डॉकिन्स वाचण्याच्या प्रयत्नात आहे. येत्या काही महिन्यांतर घर बदलणं निश्चित आहे त्यामुळे पुस्तकं विकत घेणं टाळते आहे. पण उधारीवर सुरूवात केली; त्याने १९७६ साली लिहीलेलं एकूण तेरा भाषांत(च) भाषांतरीत झालेलं The Selfish Gene वाचायला सुरूवात केली आहे. The Greatest Show on Earth: The Evidence for Evolution या वर्षाच्या सुरूवातीला धड कॉपी न मिळाल्यामुळे विकत घेतलं नव्हतं. पण कालच इन्स्टीट्यूटच्या पूर्वीच्या डायरेक्टर, राजाराम यांची कृपा होऊन रिव्ह्यूअर्स कॉपी मिळाली. राजारामच्याच भाषेत या पुस्तकात Richard Dawkins - the showman दिसतो.

वर चर्चा चाललेलं '॥नातिचरामि॥' वाचायचा प्रयत्न केला. पूर्वी मिपावरही "या पुस्तकाने" बराच गोंधळ उडवला होता म्हणून पुस्तक ग्रंथालयात दिसल्यावर घेतलं. पहिली तीस पानं कशीबशी वाचली. 'एका मनोरूग्णेचं मनोगत' असं काहीसं पुस्तकाचं नाव शोभलं असतं असं वाटलं. या बाईचं नाव मीरा असावं असं वरच्या चर्चेतून दिसत आहे. पहिल्या तीस पानांत ते मला समजलं नव्हतं. पान क्र तीसाच्यापुढे जाऊन घरातल्या काचसामानाची तोडफोड ओढवून घ्यावी असं वाटलं नाही; म्हणून पुस्तक पुढे वाचलं नाही.

सागर, आता तुला नातिचरामी भेट म्हणूनच घे माझ्याकडून! :D
वाचताना जमल्यास येंजॉय माडी! :P

किती ताप करुन घेता रे डोक्याला.
मी गेल्या शनिवारीच मस्तपैकी ४ पुस्तकं आणली. सध्या एकेक पान खाणं चालू आहे.

1. क्रमशः
2. व्रतस्थ
3. तुकडा तुकडा चंद्र
4. कल्पांत

सगळी सु.शि. :)

@ यशो: घर आपलंच आहे. कधीही ये आणि वाच. ;)

@ सागरः दहाऽऽ???? कोणती कोणती रे? जाता-येता मिळतच नाहीये. ते आणि बरसात चांदण्यांची आउट ऑफ प्रिंट आहे म्हणे.

@मोडकः आय माय स्वारी! :D बाकी, ह्या विषयावर एकदा सविस्तर चर्चा करायची आहे आपल्याशी. ;)

मी एवढ्यात विकत घेतलेली पुस्तके

• मॅजेस्टिकचा दिवाळी अंकांचा सेट
• दुर्गा भागवतांची भावमुद्रा, दुपानी आणि पैस
• भास्कर चंदावरकरांचं वाद्यवेध आणि भारतीय संगीताची मूलतत्वे
• मिलिंद बोकीलांचं झेन गार्डन

आदित्य - अरुण हेबळेकर (विज्ञान कादंबरी)
मौज प्रकाशन गृह

नभात हसरे तारे - डॉ.जयंत नारळीकर , सौ.मंगला नारळीकर आणि डॉ.अजित केंभावी (विज्ञानाविषयक)
राजहंस प्रकाशन

चूकभूल देणे घेणे - सुहास शिरवळकर (कादंबरी)
दिलीपराज प्रकाशन प्रा. लि.

कृष्णविवर - मोहन आपटे (विज्ञानाविषयक)
राजहंस प्रकाशन

मी मला दिवाळी भेट दिली. :)

आय, अझिमॉव्ह : अझिमॉव्हचे आत्मचरित्र!!! वाचनयादीतील क्रम तोडून पहिल्या क्रमांकावर जाणार असे दिसते आहे. :)

नॉर्वेजियन वुड : मुराकामीची नेहेमीपेक्षा हटके कादंबरी म्हणून उत्सुकता शिगेला पोचली आहे.